ՎԻՎԱՏ, ԱՐՏԻՍՏ

Մհեր ՄկրտչյանՄարտի 27-ին Գ. Սունդուկյանի անվան ազգային թատրոնի 80-րդ հոբելյանական թատերաշրջանի բացումը նշանավորվեց մեծանուն արտիստ Մհեր Մկրտչյանի ծննդյան 70-ամյակին նվիրված հոբելյանական երեկոյով:
Բացվեց վարագույրը, և իրար հաջորդեցին պահի մեջ քարացած կերպարներ, հերոսներ, իսկ նրանց մեջ Արտիստն է՝ Եզովպոս ու Ղազար, Պաղտասար ու Զամբախով... ու երբ վերևից իջավ մեզ այնքան ծանոթ ու սիրելի, այնքան հարազատ ժպտացող Մհերի լուսանկարը՝ դահլիճը թնդաց ծափահարություններից, ինչպես միշտ է ծափահարել, երբ բեմում հայտնվել է նա՝ ամենատխուր մարդն ու ամենաբարի կատակերգուն, համաժոդովրդական սեր վայելող Ֆրունզիկ Մկրտչյանը:
ՀՀ մշակույթի նախարար Ռոլանդ Շառոյանը, ՀԹԳՄ նախագահ Երվանդ Ղազանչյանը, ՀՀ կինեմատոգրաֆիստների միության նախագահ Սերգեյ Իսրայելյանը և, իհարկե, Արտիստի խաղընկերները' Վարդուհի Վարդերեսյանը, Հեղինե Հովհաննիսյանը, Վլադիմիր Աբաջյանը, Լոռենց Առուշանյանը, ժենյա Ավետիսյանը, Յուրի Ամիրյանը, Սամվել Սարգսյանը խոսեցին նրա մասին, և ամեն մեկի խոսքը՝ ուղղված ժպտացող Մհերին, արձագանքվում էր դահլիճում: Ե'վ վաղաժամ կորստյան ցավը, ե'վ նրա տաղանդի նկատմամբ տածած անափ հիացմունքը համակել էր բոլորին: Եվ ցավը, և հիացմունքը բոլորինն էին հավասարաչափ: Եվ այդ զգացողության լավագույն բեմական արտահայտությունն էր գտել թատրոնի գեղարվեստական ղեկավար Վահե Շահվերդյանը: Իջավ վարագույրը, դահլիճը դատարկվեց, իսկ Մհերի ժպիտը դուրս հորդաց, մեկ անգամ ևս անցավ իրեն այնքան սիրելի քաղաքի փողոցներով ու հանդիսատեսներից ամեն մեկի հետ մտավ տները՝ նորից ու նորից մի քիչ բարություն ու թեկուզ մի քիչ տխրությամբ համեմված ժպիտ բաժանելով մարդկանց:

grakan-tert-logo«Գրական Թերթ»
29.03.2010

Печать